GMA Network, wagi ng 7 award sa New York Festivals 2024; ‘Black Rider,’ nakasungkit ng bronze trophy

Muling humakot ng parangal ang GMA Network sa prestihiyosong 2024 New York Festivals TV and Film Awards. Kabilang sa tumanggap ng pagkilala ang Kapuso Primetime action series na “Black Rider.”

Bronze trophy ang iniuwi ng “Black Rider” na pinagbibidahan ni Ruru Madrid para sa Entertainment Program: Drama Category.

Panalo naman ng gold trophy ang “The Atom Araullo Specials” para sa episode na “Child’s Game” na pambato sa Documentary: Social Justice Category.

Nakakuha rin ng silver trophy ang episode na “One Deep Breath” ng “The Atom Araullo Specials” para Documentary: Human Concerns Category.

Silver trophy rin ang nakamit ng episode na “Bawat Barya” ni Atom Araullo para naman sa programang “I-Witness,” na pasok sa Documentary: Social Issues Category.

Bukod naman sa “Black Rider,” naka-bronze trophy rin ang dokumentaryo ni Howie Severino na “Boat to School.” Ganoon din ang dokumentaryo ni Mav Gonzales na “Sisid sa Putik,” para sa Documentary: Community Portraits Category.

Panalo rin ng bronze ang kauna-unahang News documentary ng GMA Integrated News 360 na “Sundo,” para sa News Program: News Documentary/Special Category.

Ang “Sundo” ay news dokyu tungkol sa mga Pinoy na naapektuhan ng digmaan ng Hamas at Israel.– FRJ, GMA Integrated News