Gary V., magreretiro na nga ba pagkatapos ng kaniyang ‘Pure Energy: One Last Time” concert?

Dahil sa titulo ng kaniyang upcoming concert sa Abril na  “Pure Energy: One Last Time,” marami ang nag-iisip kung magreretiro na nga ba si Gary Valenciano? May paliwanag dito si Mr. Pure Energy.

Sa panayam ng showbiz press, na mapapanood sa Kapuso Showbiz News, ikinuwento ni Gary na marami sa kaniyang team ang nagkomento tungkol sa titulo ng kaniyang concert at sinabing, “You cannot call it one last time.”

Pero paliwanag ng mang-aawit, hindi naman talaga siya tuluyang magreretiro pero magkakaroon na siya ng limitasyon pagdating sa pagtatanghal.

“I also look at them and I say, I told them, ‘I’m also human, you know, and I’m 59,’” sabi ni Gary na kaniyang kaniyang team.

“The next time I do a concert, kunwaring hindi ganiyan ang title, but the next time I do a concert at the Coliseum, any coliseum, whether Philippine Arena, MOA or Araneta, it will probably be in two years’ time. I’ll be 62 by then,” saad niya.

Ayon kay Gary, ayaw niyang makita ang fans na napapansin ang kaniyang pisikal na kahinaan dahil sa kaniyang edad.

“And I don’t want people to put their hands together watching me and going, ‘Magaling pero medyo humihina na siya, ‘no? Medyo hingal na hingal na siya,’” napapangiti niyang pahayag.

“Ayokong umabot ng gano’n. And my body is feeling that, especially in big stages, kasi iba ‘yung dynamic,” pag-amin niya.

Sinabi ni Gary na kaya pa niyang sumayaw nang may maliliit lamang na galawan sa isang museum o isang auditorium na may 2,000 katao.

“But when you have 10,000 people, you have to do this (malalaking galawan sa pagsayaw). And it’s not as easy,” paliwanag niya.

Nilinaw pa ni Gary na wala itong kaugnayan sa kaniyang kalusugan.

“It has nothing to do with my health. My health is good… I’m really good. It’s just knowing when it’s time to move on. So I’m not retiring,” anang beteranong singer at TV personality.

Dagdag niya, handa pa rin siyang mag-perform kung iimbitahan siya tulad ng mga TV network, o  showbiz press.

“Do you want to invite me? Game! Let’s go! But when it’s in a big venue, only people who perform in big venues will understand what it takes to do something like that,” saad niya.

Sinabi ni Gary na gusto niya na ang kaniyang concert ang magiging pinakahuling concert niya na kaya pa niyang 100% na paghataw.

“So I called it ‘One Last Time’ because I really want this to be the last big, solo, hataw na, all out, all watch. Gary is going to go ‘Pure Energy’ again. It has to end here,” aniya. “Because there’s still many, many things I want to do. So this is just a part of it.”

Vision noong 2008

Ikinuwento rin ni Gary na nagkaroon siya ng isang vision noong 2008, na ibabahagi rin sa concert.

“Now, I don’t want to get spiritual here, but in 2008, okay, now this is all the way back, I experienced, literally, a vision. I was wide awake, and I was with my wife, and all of a sudden, out of nowhere, I see this thing take place. And it wasn’t because my sugar level was low. I was fully conscious because it’s so vivid that I can tell you in detail what that vision was,” saad ni Gary.

Dagdag niya, ito ang magpapaunawa sa fans tungkol sa kaniyang naging desisyon na tumigil sa major concerts.

“That vision will be shared in this concert. And that vision won’t just be shared, but people will see what I saw. And that, hopefully, will make people go, ‘Okay, we understand now why it’s the last time of this scale.’”

Matapos ang kaniyang vision, sinabi ni Gary na hindi niya ito maintindihan noong una.

“Of course in 2008, hindi ko maintindihan kung bakit. What was that all about?” saad ni Gary. “But then, recently, I’m getting to see, wait a minute, ‘yung mga nangyayari sa akin ngayon, ‘yon ‘yun eh.”

Maging ang asawa niyang si Angeli Pangilinan ay napatanong tungkol dito.

“So, even Angeli came to me and she goes, ‘But, Gary, you’re gonna call it ‘one last time.’ Ano naman ‘yung role ng vision mo? And now, you’re still performing,” kuwento niya.

Tugon naman ni Gary, “When you’re given a vision, it’s about something that’s going to take place in the future. As to when that’s going to happen, Siya (Diyos) lang ang nakakaalam nu’n.”

“And now is the future of that time. And it’s happening now. So, that’s why I can smile. It’s gonna be emotional for me, of course, you know.”

Gaganapin ang dalawang gabing concert ni Gary na Abril 26 at 27 sa SM Mall of Asia Arena. Kasabay ito ng kaniyang ika-40 anibersaryo sa entertainment.

 
— FRJ, GMA Integrated News